હું તો જગના જંજાળેથી પરવળ્યો
મુજને સહેજે મળ્યા ગુરૂદેવ, મારે સોના સરીખો સૂરજ ઉગીયો
મેં તો શાંતિ ઘડુલે શ્રીફળ મુકીયાં
મેં તો સંતો તેડવ્યા આનંદભેર, મારે સોના સરીખો સૂરજ ઉગીયો
મેં તો મંડ્પ રોપાવી તોરણ બાંધીયા
માર હૈયામાં હરખ ના માય, મારે સોના સરીખો સૂરજ ઉગીયો
કંકુકેસરની ભરી રે કંકાવટી
ચૌવા ચંદનને ફુલડાનો હાર, મારે સોના સરીખો સૂરજ ઉગીયો
મેં તો ચરણ ધોઇ ચરણામૄત પી લીધાં
મારો સફળ બન્યો અવતાર, મારે સોના સરીખો સૂરજ ઉગીયો
પૂજન વિધિ પરવારી ભોજન આપીયાં
મારા મનનો પીરસાવ્યો મોહનથાળ, મારે સોના સરીખો સૂરજ ઉગીયો
મેં તો અગમ નિગમના પાસા ઢાળીયા
ચુંથારામ રમે સદ્ગુરૂ સાથ, મારે સોના સરીખો સૂરજ ઉગીયો
No comments:
Post a Comment