(રાગ: ઘડપણમાં ગોવિંદ ગાશું......)
ચૈતન્ય ચિંતન કરશું ગુરુજી અમે ચૈતન્ય ચિંતન કરશું.
અમે આત્મ-વિજ્ઞાન દીવો ધરશું...ગુરુજી અમે ચૈતન્ય ચિંતન કરશું.
અમે આત્મ સ્વરૂપમાં રમશું - અમે અખંડ આનંદમાં ફરશું.
અમે નિજમાં નિજ અનુસરશું....ગુરુજી અમે ચૈતન્ય ચિંતન કરશું.
અમે નિરાવરણ પ્રકાશશું - અમે સુત્રાત્મા સર્વમાં વ્યાપશું
અમે અદ્વૈત સાક્ષીરૂપ ઠરશું...ગુરુજી અમે ચૈતન્ય ચિંતન કરશું.
અમે બ્રહ્મ ભાવે સ્વચ્છ બની રહીશું - અમે નિરાકારે નિર્મળ રહીશું
ચુંથારામ શાંતિ: શાંતિ: અનુભવશું...ગુરુજી અમે ચૈતન્ય ચિંતન કરશું.
(રાગ: દ્વારિકાથી પ્રભુ આવિયા રે....)
હું તો અસંગ નિર્લેપ છું રે....
સચ્ચિદાનંદ મારું રૂપ મારા વા'લા...હું અવિનાશી નિત્ય શુદ્ધ છું રે..
નિરાકાર રૂપે નિત્ય મુક્ત છું રે....
પૂર્ણાનંદે પરિધાન મારા વા'લા........હું અવિનાશી નિત્ય શુદ્ધ છું રે..
હું અચ્યુત નિર્દોષ નિત્ય છું રે.....
ચૈતન્યરૂપ પરમાનંદ મારા વા'લા........હું અવિનાશી નિત્ય શુદ્ધ છું રે..
અખંડાનંદ આત્મ રૂપ છું રે.......
પ્રકૃતિથી પર શાંત રૂપ મારા વા'લા.......હું અવિનાશી નિત્ય શુદ્ધ છું રે..
મહતવાદી તત્વોથી પર રહ્યો રે....
જ્યોતિ સ્વરૂપ ચુંથારામ મારા વા'લા......હું અવિનાશી નિત્ય શુદ્ધ છું રે..
(રાગ: દ્વારિકામાં વાજાં વાગીયાં રે...)
મારા ગુરુજીનો આદેશ આવીયો રે....
મારી સુરતાએ ઝીલ્યો આદેશ...શ્રીજી અમને પાકી પરવાનગી મોકલી..
સંત શાખે અભયદાન આપ્યું....
જાણી પોતાનો પ્રગટ્યો સ્નેહ....શ્રીજી અમને પાકી પરવાનગી મોકલી..
આવન-જાવનના સંદેશા તોડીયા....
અમરધામના સંદેશા હોય...શ્રીજી અમને પાકી પરવાનગી મોકલી..
દ્વૈત ટાળી, અદ્વૈતમાં ભેળવ્યો....
આપી દીક્ષા તોડ્યું અભિમાન....શ્રીજી અમને પાકી પરવાનગી મોકલી..
પરહિતમાં પ્રેરક બનાવીયો.....
ચુંથારામ ચઢ્યો ગુરુ રંગ....શ્રીજી અમને પાકી પરવાનગી મોકલી..
(રાગ: પરભુ ઊંડો તે કૂવો જળ ભર્યો....)
દિલ દ્વારિકાપૂરી રળીયામણી......
વૃત્તિ રૂક્ષ્મણી રાંધે રસોઈ....પુરષોત્તમને પીરસવા
પ્રેમ પૂરી પકવાન બનાવિયા........
ભાવે ઓસાવ્યો આનંદી ભાત રે....પુરષોત્તમને પીરસવા
ધર્મ નીતિના વ્યંજનો નીપજ્યા......
માખણ, મીસરીને કઢિયેલ દૂધ રે....પુરષોત્તમને પીરસવા
દયા દાળ, સમતા શાકની શોભા બની......
બ્રહ્મ ખુમારી ચટણી અથાણાં રે....પુરષોત્તમને પીરસવા
જમુના સુક્ષમણા જળની જાળી ભરી......
પ્રેમ પાટલે પધાર્યા સુંદર શ્યામ રે...પુરષોત્તમને પીરસવા
જોતાં જમનાર જમાડનાર કોઈ નહિ......
ચૂંથારામ આકાર નીરાકારમાં જાય રે....પુરષોત્તમને પીરસવા
(રાગ:ત્રાંબા તે કુંડી સવા ગજ ઊંડી ......)
(રાગ: જાગ જીવલડા, ભવસાગરના કાઠે આવેલું નાવ બુડશે)
જાગ જીવલડા, વાણેલાં વાયાં ને રજની વીતી ગઈ
આ મનુષ્ય દેહ તે વાણું છે
હરિ ભજવાનું શુભ ટાણું છે
હરિ નામ નારાયણ નાણું છે, જાગ જીવલડા,........ (૧)
આ દેહ તો મોક્ષ દરવાજો છે
નીકળવાનો લાગ સારો છે
સત સંતોનો સંગ સારો છે, જાગ જીવલડા, .........(૨)
સદગુરુનું શરણું ઝડપી લે
તન મન ધન શિશ સમર્પી દે
તારા હું પદ ભાવને હરફી દે,જાગ જીવલડા, ........ (૩)
અજ્ઞાન નિંદ્રાથી જાગી જા
દોષ દુર્ગુણ દંગા ભાગી જાય
મોહ મમતા ભડ ભડ લાગી જાય, જાગ જીવલડા, ...... (૪)
સતસંગમાં મનડું રંગાઈ જાય
જગ વ્યવહાર વાતો વિસરાઈ જાય
સ્વરૂપમાં સુરતા સ્થિર થઇ જાય, જાગ જીવલડા, ........(૫)
ગુરુ છગન્રરામ શીખ સમજાઈ જાય
વેણ ને નેણ નિર્મળ થઇ જાય
પરાંણભાઈ વર્તન પલટાઈ જાય, જાગ જીવલડા, .......... (૬)
(રાગ: અમે ઈડરિયો ગઢ જીત્યારે આનંદ ભયો...)
અમને સમર્થ સદગુરુ મળીયા રે આનંદ ભયો
મારે ફેળા ચોરાસીના ટળીયા રે આનંદ ભયો
મારે દોહ્યલી વેળાના દા'ડા વીત્યા રે આનંદ ભયો
અમે બાવનીયો ગઢ જીત્યા રે આનંદ ભયો
જાણી જાણી જગત જાળ જુઠી રે આનંદ ભયો
મારી વૃત્તિ રૂપમાંથી ઉઠી રે આનંદ ભયો
એ તો સમજણ ઘરમાં પેઠી રે આનંદ ભયો
નિજ સ્વરૂપે કરીને સ્થિર બેથી રે આનંદ ભયો
ત્યાં તો જન્મ મરણ ણા હોય રે આનંદ ભયો
ત્યાં તો અખંડ આનંદ વર્તાયરે આનંદ ભયો
મારી ભેદભ્રમણા ભાગી રે આનંદ ભયો
ઝળહળ જ્યોત સ્વરૂપની જાગી રે આનંદ ભયો
અમે કર્તા અકર્તા નહિ રે આનંદ ભયો
સદા સ્થિર સ્વરૂપની મહી રે આનંદ ભયો
ગુરુ છગન સ્વરૂપે સમિતા રે આનંદ ભયો
પરાંણભાઈ ગુરુના વચને રસ પીધા રે આનંદ ભયો
(રાગ: સર્વે સગાં બદ્રીપતિને સાંભળો રે)
ધન્ય ધન્ય ભાગ્ય વૈરાગ વષયો જેના રુદીયે રે
સદગુરુ સેવી પ્રેમના પંથે પોતે પડીયો રે
ચાર પ્રકારના વૈરાગ ચાર કહેવાય રે
યતમાન પહેલો વ્યતિરેક બીજો થાય રે
એક ઇન્દ્રિયને વશીકરણ ચોથો થાય રે
સ્મશાન વૈરાગ પહેલો યતમાન ગણાય રે
વ્યતિરેક તે વિષયો ત્યાજે માન માટે રે
મનથી રાગ થયો છે જેનો પહ બહાર દેખાય રે
એકે ઇન્દ્રિય તેથી પરમ સુખ થાય રે
નિશદિન ઉઠતી લહેરો આનંદની લહેરાય રે
રાગ રહિત જે બહાર ભીતર એક રૂપ રે
વશી કાટ તે મુક્તપણું તે કહેવાય રે
બ્રહ્મસ્વરૂપે કરીએ તેને ચુંથારામ રે
