સુણો સહેલી વાત સતસંગની રે

(રાગ: શ્રીનાથજી તે છેલમાં બિરાજતા જો)

સુણો સહેલી વાત સતસંગની રે 

ફોગટબાજી સંસારના સુખડાંજો સુણો સહેલી વાત સતસંગની રે 

જેવું ઝાકરનું નીર મોતી ઝળહળે રે

તે તો વણસી જાશે પળવારમાં - સુણો સહેલી વાત સતસંગની રે 

જેવી ગેડ્યાંની રેટ ઘટમાળ છે રે 

એક ભરાય એક ખાલી થાય છે - સુણો સહેલી વાત સતસંગની રે 

એક અવતરે એક મટી જાય છે રે 

એવું સમજી કપટ છળ છોડીયે - સુણો સહેલી વાત સતસંગની રે 

પુણ્ય પાપનો જવાબ ખાતું ખોલશે રે 

જયારે જમના કીંકરો આવી ઝાલશે - સુણો સહેલી વાત સતસંગની રે 

મિથ્યા મમ્મત કર્યે શું થાય છે રે 

હરિના હુકમ વિના તરણું હાલે નહીં - સુણો સહેલી વાત સતસંગની રે 

જેમ અંજલિનું જળ વહ્યું જાય છે રે 

એની પેરે આવરદા ઘટી જાય છે - સુણો સહેલી વાત સતસંગની રે 

તજી ગર્વ ગોવિંદ ગુણ ગાઈએ રે 

ચુંથા હરિ ભજી પાર પામીએ - સુણો સહેલી વાત સતસંગની રે