બ્રહ્મ વિના બીજું ભાળતા નથી

(રાગ: છાનું છાનું રે છોકરા મારું તનમનીયું)

અમે બ્રહ્મ વિના બીજું કાંઈ ભાળતા નથી 

ભાળતા નથી ભાળતા નથી....અમે બ્રહ્મ વિના બીજું કાંઈ ભાળતા નથી 

એક જાતી જ્યાં છે નહીં ત્યાં ક્યાં જાતી ચાર

એક વર્ણ જ્યાં છે નહીં ત્યાં ક્યાં વર્ણ અઢાર

આત્મદ્રષ્ટિથી અમે વટલાતા નથી....અમે બ્રહ્મ વિના બીજું.....

અમે સાંભળતા નથી કોઈ કહે કટુ વેણ 

કરવા દર્શન અશુભનું અમને છે નહીં નેણ 

મિથ્યા મોહ શોકથી પ્રજળતા નથી....અમે બ્રહ્મ વિના બીજું.....

નિજ સ્વરૂપનો અમને ઉરમાં રહે અખંડ બોધ

ચુંથારામ ભય ચિંતા કેરો ક્યાંથી પ્રગટે ક્રોધ

વિપત્તિ વૃષ્ટિથી અમે પલળતા નથી....અમે બ્રહ્મ વિના બીજું.....